Shardul Thakur: ముంబై ఇండియన్స్‌లోకి శార్దూల్.. పొరపాటున లీక్ చేసిన స్టార్ స్పిన్నర్
Studio18 News - క్రీడలు / : ముంబై ఇండియన్స్‌లోకి శార్దూల్ ఠాకూర్ ట్రేడ్ విషయాన్ని ధ్రువీకరించిన స్పిన్నర్ రవిచంద్రన్ అశ్విన్ తన యూట్యూబ్ చానల్‌లో పొరపాటున వెల్లడించిన మాజీ స్పిన్నర్ లక్నో సూపర్ జెయింట్స్ నుంచి ముంబైకి మారిన శార్దూల్ వివాదం కావడంతో వీడియో నుంచి ఆ భాగం తొలగింపు ఐపీఎల్ 2026 సీజన్‌కు ముందు జరగబోయే ఆటగాళ్ల ట్రేడింగ్‌పై ఆసక్తికరమైన వార్త ఒకటి బయటకు వచ్చింది. టీమిండియా ఆల్‌రౌండర్ శార్దూల్ ఠాకూర్‌ను లక్నో సూపర్ జెయింట్స్ (ఎల్ఎస్‌జీ) నుంచి ముంబై ఇండియన్స్ (ఎంఐ) ట్రేడ్ చేసుకున్నట్లు సీనియర్ స్పిన్నర్ రవిచంద్రన్ అశ్విన్ పొరపాటున ధ్రువీకరించారు. తన యూట్యూబ్ ఛానల్‌లో మాట్లాడుతూ ఆయన ఈ విషయాన్ని వెల్లడించారు. ఐపీఎల్ ట్రేడింగ్ విండో ముగియనున్న నేపథ్యంలో శార్దూల్ ఠాకూర్, అర్జున్ టెండూల్కర్‌ల విషయంలో ముంబై, లక్నో ఫ్రాంచైజీల మధ్య చర్చలు జరుగుతున్నాయని కొన్ని రోజులుగా వార్తలు వస్తున్నాయి. అయితే ఇది ఆటగాళ్ల పరస్పర మార్పిడి (స్వాప్ డీల్) కాదని, రెండు ఫ్రాంచైజీల మధ్య జరిగే వ్యక్తిగత డీల్స్ అని క్రిక్‌బజ్ తన కథనంలో పేర్కొంది. ఈ ఊహాగానాలకు బలం చేకూరుస్తూ, అశ్విన్ తన యూట్యూబ్ ఛానల్ ‘యాష్ కీ బాత్’లో ఈ ట్రేడ్ జరిగిపోయిందని చెప్పేశారు. "ముంబై ఇండియన్స్ ఎవరినీ విడుదల చేస్తుందని నేను అనుకోవడం లేదు. తరచూ గాయాలపాలయ్యే దీపక్ చాహర్‌కు ప్రత్యామ్నాయం వెతకడం వారికి పెద్ద సవాలుగా ఉంటుంది. వారు ఇప్పటికే లక్నో నుంచి శార్దూల్ ఠాకూర్‌ను ట్రేడ్ ద్వారా దక్కించుకున్నారు. ఇది జరిగిపోయింది. బహుశా వారు ఒక స్పిన్నర్ కోసం చూసి, అతడిని కూడా తీసుకుంటారు" అని అశ్విన్ వ్యాఖ్యానించారు. అయితే ఈ వ్యాఖ్యలు వివాదాస్పదం కావడంతో, ఆ తర్వాత వీడియో నుంచి ఈ భాగాన్ని తొలగించారు. ఐపీఎల్ 2025 మెగా వేలంలో శార్దూల్ అమ్ముడుపోని ఆటగాడిగా మిగిలిపోయాడు. ఆ తర్వాత లక్నో జట్టులో మొహ్సిన్ ఖాన్ గాయపడటంతో అతడి స్థానంలో శార్దూల్‌ను తీసుకున్నారు. సీజన్ ఆరంభంలో తొలి రెండు మ్యాచ్‌లలో 6 వికెట్లతో రాణించినా, ఆ తర్వాత అదే జోరును కొనసాగించలేకపోయాడు. మొత్తం 10 మ్యాచ్‌లలో 13 వికెట్లు పడగొట్టాడు. ఇక అర్జున్ టెండూల్కర్ 2023లో ఐపీఎల్‌లోకి అరంగేట్రం చేసి, ముంబై ఇండియన్స్ తరఫున ఇప్పటివరకు 5 మ్యాచ్‌లు ఆడి 3 వికెట్లు మాత్రమే తీశాడు. ఐపీఎల్ 2025 వేలంలో అతడిని ముంబై ఇండియన్స్ రూ. 30 లక్షల కనీస ధరకు తిరిగి కొనుగోలు చేసింది. ఈ ఏడాది ఆరంభంలో మెగా వేలంలో అమ్ముడుపోకపోవడంపై శార్దూల్ మాట్లాడుతూ.. "క్రికెట్లో ఇలాంటివి జరుగుతుంటాయి. వేలంలో అది నాకు ఒక చెడ్డ రోజు. లక్నో జట్టులో బౌలర్లకు గాయాలవడంతో వారే నన్ను మొదట సంప్రదించారు. జహీర్ ఖాన్ వంటి లెజెండ్ ఉన్నప్పుడు నేను అంగీకరించాల్సి వచ్చింది. క్రికెట్లో ఇలాంటి ఎత్తుపల్లాలను ఎదుర్కోవాల్సి ఉంటుంది" అని అన్నాడు.
Admin
Studio18 News
మరిన్ని వార్తలు
Developed By :
